Het waopen en de vlag

Het waopen

Zeuvenhonderd jaor leden har de Landschap Drenthe al een eigen zegel. Het Drèentse waopen (sinds 1972 in gebroek) is daorvan ofleid. Op een golden troon zit Maria met op de kop een golden kroon van drei lelies. Zie hef een rood klied an met daor een blauwe mantel overhen. In de rechterhaand holdt ze een scepter vast, die eindigt in een lelie. Op heur linker knei zit het Kindtie Jezus met zulvern goed an. Bovenop het schild stiet een golden kroon van vief blaoder, veer paorels en drei diademen, die rood gevoerd is. An weerskanten van het schild staot twei golden leeuwen met een rooie tong en rooie naogels.

De vlag

Sinds 1947 hef Drenthe een eigen vlag. Het is een witte vlag met in de midden twei rooie baonen. Tussen dizze twei horizontaole baonen stiet een zwarte toren met an weerskanten drei rooie, viefpuntige sterren met ien punt hen boven.
De vlag hef de kleuren wit en rood, umdat dit de traditionele Saksische kleuren bint. Wit en rood bint ok de kleuren van Utrecht. Drenthe was lang leden een diel van het Oversticht en de bisschop van Utrecht was hier doedertied de baos.
De zes sterren staot veur de zes dingspels (de zes rechtsgebieden die vrogger zo belangriek waren): Zudenveld, Oostermoer, Noordenveld, Rolder, Beiler en Dieverder dingspel. De toren stiet veur het kasteel van Coevern, umdat der een tied west hef dat de drosten (landsheren) van daoroet Drenthe bestuurden.