Even kört over Drenthe

Zie nuumt Drenthe ok wal 'De Olde Landschap'. Dat is gloepends juust: de oldste sporen van mensen die hier woond hebt, komt van 60.000 jaor hèer. Mammoetjaogers woonden toen in Drenthe. Laoter kwam het volk, umdebij 5000 jaor leden, dat de hunebedden achterleut in dizze streken.

Je kunt het Drèentse laand zien as een soepbord dat op de kop lig: in de midden is Drenthe hoog en an de kaanten lig het legere diel. De bos, de veengebieden, de heidevelden en de beken bint der maank akkers en gruunlaand.

Nao de Tweide wereldoorlog hef de industrie zuch haard ontwikkeld in Drenthe. Nargens in Nederland is der zo veul industrie bij mekaor as in en um Emmen. Maor de mieste mensen warkt al een hiele zet niet meer in febrieken. Net as overal in oes laand warkt aal meer volk in Drenthe in de dienstensector. Hierbij moej denken an commerciële instellings as banken en verzekeringsmaotschappijen, maor ok an de overheid en instellings in de zörg. Intied dat Drenthe nog aaid een previncie is met een landelijk karakter, wordt de landbouw toch aal minder belangriek. Een oetzundering daorop is de tuunbouw rondum Emmen.

Aj 't vergeliekt met hiel Nederland is Drenthe maor dunbevolkt. Op 1 jannewaorie 2004 woonden der 482.415 mèensen. Aal jaor komt er miljoenen toeristen, die Drenthe bezuukt um zuch te vernuvern in de prachtige natuur en gebroek te maoken van alle meugelijkheden die der bint um actief en sportief vekaansie te holden.