Zoeken

Drents


Wij bint bliede daj bij de previncie Drenthe bint

Tussen de regering in Den Haag en je eigen gemiente stiet de previncie. Elkenien komt wal ies een maol in 't gemientehoes. Maor… bi'j wal ies in 't previnciehoes west? Hej ienig idee wat of daor alle daogen gebeurt en waj daor deur dag en tied van markt? In dit boekie kuj lezen hoe of de previncie Drenthe bestuurd wordt. Kom in de kunde met de lu die 't veur 't zeggen hebt in Drenthe en met het wark dat de metwarkers van de previncie doet.
De previncie hef op veul gebieden een belangrieke taok veur de mensen die in Drenthe woont. Zo zörgt de previncie veur de natuurgebieden en het underhold van wegen en kenaolen. Hie gef ok geld (subsidies) an een hiele koppel instellings die zuch gangs holdt met kunst en cultuur, zoas theaters, museums, bibliothieken en organisaotsies veur de Drèentse taol. Instellings die zuch drok maokt um de natuur of um sport kriegt vanzölf ok geld.

't Kan weden dat de previncie döt wat e doen mot, umdat der wetten bint die heur dit vertelt, maor mangs kös de previncie der zölf veur. Paartie wetten en regelingen wordt oetvoerd deur gemientes. Vaok regelt de previncie dan wal dinger of zeg tegen de gemientes wat of der daon worden mot.

In de provinciaole poletiek giet het vaok over underwarpen waor de Drenten direct met te maoken hebt. De indieling van de ruumte in de previncie, de anleg van woonwieken, bedrieventerreinen en wegen bint dinger waor de previncie zuch gangs met holdt en waor de inwoners veul belangstelling veur hebt. Wat de previncie döt, komt dan ok veul körter bij de mensen as hiel wat denkt.